ಆರು ನಿಮಿಷಗಳ ನಡಿಗೆ ಪರೀಕ್ಷೆ- ನಿಮ್ಮ ಶ್ವಾಸಕೋಶದ ಅರೋಗ್ಯಕ್ಕಾಗಿ

ಜಾಗತಿಕ ಸಾಂಕ್ರಾಮಿಕದ ಈ ಸಮಯದಲ್ಲಿ ನಮ್ಮ ಶ್ವಾಸಕೋಶದ ಕಾರ್ಯಚಟುವಟಿಕೆಯನ್ನು ಪರಿಶೀಲಿಸುವುದು ಅವಶ್ಯಕವಾಗಿದೆ. ಮಹಾರಾಷ್ಟ್ರದ ಆರೋಗ್ಯ ಇಲಾಖೆ ಸೂಚಿಸಿದ ಸರಳ ಪರೀಕ್ಷೆಯೊಂದಿಗೆ ಇದನ್ನು ನಾವು ಮಾಡಬಹುದು.

ಇದು ಆರು ನಿಮಿಷಗಳ ನಡಿಗೆ ಪರೀಕ್ಷೆಯಾಗಿದ್ದು, ಮನೆಯಲ್ಲಿ ಮಾಡಬಹುದಾದ ಸರಳ ಪರೀಕ್ಷೆಯ ಬಗ್ಗೆ ನಾಗರಿಕರಲ್ಲಿ ಜಾಗೃತಿ ಮೂಡಿಸುವಂತೆ ಮಹಾರಾಷ್ಟ್ರದ ಪ್ರಧಾನ ಕಾರ್ಯದರ್ಶಿ ಪ್ರದೀಪ್ ವ್ಯಾಸ್ ಮನವಿ ಮಾಡಿದ್ದಾರೆ.

ಈ ಪರೀಕ್ಷೆಯು ಆಮ್ಲಜನಕದ ಮಟ್ಟದಲ್ಲಿನ ಕಮ್ಮಿ ಆಗುವುದನ್ನು ಗುರುತಿಸಲು ಸಹಾಯ ಮಾಡುತ್ತದೆ. ಮಟ್ಟವು ನಿರ್ಣಾಯಕ ಮಟ್ಟಕ್ಕಿಂತ ಕಡಿಮೆಯಾದರೆ ರೋಗಿಯನ್ನು ತಕ್ಷಣ ಆಸ್ಪತ್ರೆಗೆ ದಾಖಲಿಸಬಹುದು.

ಯಾರಿಗೆ ಈ ಪರೀಕ್ಷೆ ಅಗತ್ಯ:

ಜ್ವರ, ಕೆಮ್ಮು ಮತ್ತು ಶೀತ ಅಥವಾ ಕರೋನಾ ಸೋಂಕಿನ ಲಕ್ಷಣಗಳು ಮತ್ತು ಮನೆಯ ಪ್ರತ್ಯೇಕತೆಯಲ್ಲಿರುವ ರೋಗಿಗಳಿಗೆ.

ಪರೀಕ್ಷೆಯನ್ನು ಹೇಗೆ ಮಾಡುವುದು

ನಿಮ್ಮ ಬೆರಳನ್ನು ಆಕ್ಸಿಮೀಟರ್‌ನಲ್ಲಿ ಇರಿಸುವ ಮೂಲಕ ಆಮ್ಲಜನಕದ ಮಟ್ಟವನ್ನು ಗಮನಿಸಿ (ಬೆರಳನ್ನು ಸರಿಯಾಗಿ ಸೆನ್ಸರ್ ಸಂಪರ್ಕದಲ್ಲಿರಿಸಿಕೊಳ್ಳಿ).

ನಿಮ್ಮ ಬೆರಳಿನಲ್ಲಿ ಆಕ್ಸಿಮೀಟರ್ ಇಟ್ಟುಕೊಂಡು ಕೋಣೆಯಲ್ಲಿ ನಡೆಯಲು ಪ್ರಾರಂಭಿಸಿ. ಆರು ನಿಮಿಷಗಳ ಕಾಲ ಸಾಮಾನ್ಯ ವೇಗದಲ್ಲಿ ನಡೆಯಿರಿ (ಮೆಟ್ಟಿಲುಗಳನ್ನು ಏರಬೇಡಿ). ಆರು ನಿಮಿಷಗಳ ಕಾಲ ನಡೆದ ನಂತರ ಮತ್ತೆ ಆಮ್ಲಜನಕದ ಮಟ್ಟವನ್ನು ಗಮನಿಸಿ.

ಆರು ನಿಮಿಷಗಳ ನಂತರ ಆಮ್ಲಜನಕದ ಮಟ್ಟ ಕಮ್ಮಿ ಆಗದಿದ್ದರೆ ನೀವು ನಿಮ್ಮನ್ನು ಆರೋಗ್ಯವಂತರು ಎಂದು ಪರಿಗಣಿಸಬಹುದು. 1-2 % ಕಮ್ಮಿ ಆದರೂ ಚಿಂತಿಸಬೇಕಾಗಿಲ್ಲ. ಪರೀಕ್ಷೆಯನ್ನು ಇನ್ನೂ 2 ಬಾರಿ ಪುನರಾವರ್ತಿಸಿ ಮತ್ತು ಬದಲಾವಣೆಯನ್ನು ಗಮನಿಸಿ.

ಪರೀಕ್ಷೆಯ ತೀರ್ಮಾನ:

ಆಮ್ಲಜನಕ ಮಟ್ಟ 93 % ಕ್ಕಿಂತ ಕಡಿಮೆ ಆದರೆ ಅಥವಾ ನಡೆಯುವ ಮೊದಲು ಕಂಡುಬಂದ ಸಂಖ್ಯೆಗಿಂತ ಶೇಕಡಾ 3 ಕ್ಕಿಂತಲೂ ಹೆಚ್ಚು ಕಡಿಮೆಯಾಗುತ್ತಿದ್ದರೆ ಮತ್ತು ವ್ಯಕ್ತಿಯು ಆರು ನಿಮಿಷಗಳ ಕಾಲ ನಡೆದ ನಂತರ ದಣಿದರೆ ಅಥವಾ ಉಸಿರಾಟದ ತೊಂದರೆ ಹೊಂದಿದ್ದರೆ, ಆ ವ್ಯಕ್ತಿಗೆ ಬೇಕಾದಷ್ಟು ಆಕ್ಸಿಜನ್ ಸಿಗುತ್ತಿಲ್ಲ ಎಂದು ನಿರ್ಧರಿಸಬಹುದು. ಮತ್ತು ಆ ವ್ಯಕ್ತಿಯನ್ನು ಕೂಡಲೇ ವೈದ್ಯಕೀಯ ಶುಶ್ರುಷೆಗೆ ಒಳಪಡಿಸಬೇಕು

ಕುಳಿತಾಗಲೂ ಉಸಿರಾಟದ ತೊಂದರೆ ಇರುವವರು ಈ ಪರೀಕ್ಷೆಯನ್ನು ಮಾಡಬಾರದು. 60 ವರ್ಷಕ್ಕಿಂತ ಮೇಲ್ಪಟ್ಟ ವ್ಯಕ್ತಿಗಳು 6 ನಿಮಿಷಗಳ ಬದಲು 3 ನಿಮಿಷಗಳ ಕಾಲ ಈ ಪರೀಕ್ಷೆಯನ್ನು ಮಾಡಬಹುದು.